• As actuacións do PSTD inclúen a rexeneración do entorno fluvial do río Arenteiro e a ampliación da súa senda, reforzando un modelo turístico sostible vinculado ao territorio

O Concello continúa desenvolvendo actuacións no marco do Plan de Sostibilidade Turística en Destino (PSTD) “O Carballiño e a gastronomía do polbo”, centradas na rexeneración ambiental, a posta en valor do territorio e a mellora da accesibilidade.

Este bloque de actuacións forma parte do investimento global de 1.000.000 de euros financiados pola Unión Europea – NextGenerationEU, no marco do Plan de Recuperación, Transformación e Resiliencia, coa participación do Ministerio de Industria e Turismo e a Axencia de Turismo de Galicia.

Unha das actuacións principais é a rexeneración do entorno fluvial do río Arenteiro, cun investimento de 118.905,34 euros. Esta intervención ten como obxectivo recuperar espazos degradados, mellorar a súa integración co núcleo urbano e consolidar este entorno como un espazo de lecer, encontro e contacto coa natureza, tanto para a veciñanza como para as persoas visitantes.

Paralelamente, estase a levar a cabo a ampliación da Senda do Arenteiro (PR-G 79) ata o Bañiño de Arcos, cun investimento de 72.581,77 euros. Esta actuación permitirá ampliar a rede de sendeiros do municipio, mellorar a accesibilidade a zonas de alto valor ambiental e favorecer a mobilidade sostible, promovendo un turismo activo e respectuoso co medio.

Estas intervencións responden a unha estratexia que sitúa a natureza e o territorio como elementos centrais da experiencia turística, contribuíndo á conservación dos recursos naturais e á mellora da calidade ambiental. Ao mesmo tempo, reforzan a conexión entre o espazo urbano e o medio natural, xerando novas oportunidades de uso e desfrute que contribúen á desestacionalización da actividade turística.

O Carballiño consolida así un modelo de desenvolvemento turístico baseado na sostibilidade, na posta en valor dos seus recursos propios e na creación de experiencias vinculadas ao territorio.

• O Carballiño impulsa a súa transformación dixital coa renovación da comunicación dixital e a implantación de sinalización interactiva para mellorar a experiencia visitante

O Concello continúa avanzando na execución do Plan de Sostibilidade Turística en Destino “O Carballiño e a gastronomía do polbo”, cun conxunto de actuacións centradas na dixitalización, a innovación e a mellora da experiencia turística.

Este bloque de actuacións forma parte do investimento global de 1.000.000 de euros financiados pola Unión Europea – NextGenerationEU, no marco do Plan de Recuperación, Transformación e Resiliencia, coa participación do Ministerio de Industria e Turismo e a Axencia de Turismo de Galicia.

Entre as actuacións máis destacadas atópase o desenvolvemento dunha nova estratexia de comunicación dixital, orientada a reforzar o posicionamento do Carballiño como destino turístico sostible, innovador e competitivo.

Esta estratexia inclúe a definición dunha nova imaxe de destino, a actualización da páxina web turística e a produción de contidos audiovisuais adaptados ás novas formas de consumo, co obxectivo de mellorar a visibilidade do municipio e atraer novos públicos. Ademais, estanse a incorporar ferramentas innovadoras como a gamificación e os contidos interactivos, que permiten ofrecer experiencias máis dinámicas e participativas ás persoas visitantes.

No ámbito da innovación, está prevista a implantación dun sistema de sinalización turística intelixente, cun investimento de 75.505,93 euros. Este sistema permitirá acceder a información interactiva en varios idiomas a través de tótems e pantallas dixitais, facilitando a interpretación do patrimonio e mellorando a experiencia global das persoas visitantes.

A incorporación destas solucións tecnolóxicas supón un paso adiante na modernización do destino, integrando a dixitalización como eixo clave da súa estratexia turística.

O conxunto destas actuacións responde á necesidade de adaptar a oferta turística ás novas demandas do sector, caracterizadas por un maior uso da tecnoloxía, a busca de experiencias personalizadas e o acceso inmediato á información.

O Concello aposta por un modelo turístico que combina identidade local, innovación e proxección exterior, que reforce a súa capacidade para competir nun contexto cada vez máis dixitalizado.

O Carballiño avanza na execución do Plan de Sostibilidade Turística en Destino (PSTD) “O Carballiño e a gastronomía do polbo”, unha iniciativa impulsada polo Concello que supón un investimento total de 1.000.000 de euros financiados pola Unión Europea a través dos fondos NextGenerationEU, no marco do Plan de Recuperación, Transformación e Resiliencia; do Ministerio de Industria e Turismo e a Axencia de Turismo de Galicia.

O obxectivo principal deste plan é reforzar o posicionamento do municipio como destino turístico gastronómico sostible e innovador, tomando como base un dos seus principais sinais de identidade: a tradición do polbo, que se expresa a través do colectivo de pulpeiras e pulpeiros, a experiencia gastronómica ao longo de todo o ano e a celebración da Festa do Pulpo, declarada de interese turístico internacional .

Actuacións xa executadas: patrimonio, aloxamento e cultura
Desde o inicio do plan en abril de 2024, puxéronse en marcha diversas actuacións clave. Entre elas destaca a creación da Oficina Técnica do PSTD, encargada da coordinación, seguimento e avaliación do conxunto do proxecto, cun investimento de 61.811,98 euros.

No ámbito da posta en valor do patrimonio, levouse a cabo a posta en marcha do Museo do Papel, cun investimento de 168.188,02 euros, que permitiu recuperar a maquinaria do antigo muíño de papel da Lavandeira e habilitar o espazo como recurso museístico, ampliando a oferta cultural e turística do municipio.

Tamén se executou a rehabilitación sostible das pallozas do camping municipal, cun investimento de 176.094,66 euros, orientada a mellorar a oferta de aloxamento turístico mediante a creación de espazos singulares adaptados a criterios de eficiencia enerxética e redución da pegada de carbono.

No ámbito do patrimonio arquitectónico, destaca a renovación da iluminación do Templo da Veracruz, cun investimento de 87.846 euros, que permitiu mellorar a visibilidade do monumento ao tempo que se reduce o consumo enerxético e a contaminación lumínica.

Un modelo turístico baseado na identidade e na sostibilidade
O conxunto destas actuacións responde a unha estratexia global que busca transformar O Carballiño nun destino turístico máis sostible, competitivo e desestacionalizado, capaz de atraer visitantes ao longo de todo o ano.

O plan aposta por poñer en valor os recursos propios do territorio (gastronomía, patrimonio, natureza e tradición) ao tempo que incorpora innovación, dixitalización e novos formatos de promoción adaptados ás demandas actuais do sector.

A finalización do PSTD, prevista para xuño de 2026, marcará o peche dunha etapa clave na transformación turística do municipio, sentando as bases dun modelo de desenvolvemento que combina identidade local, sustentabilidade e proxección exterior.

O Carballiño acolleu unha nova sesión de traballo do club de produto “Polbo con Orixe”, na que participaron representantes do ámbito empresarial e asociativo da vila e da súa contorna, reafirmando o seu compromiso co desenvolvemento turístico do destino.

A cuarta mesa participativa, celebrada o pasado luns 23 de marzo, centrouse no deseño e desenvolvemento de experiencias turísticas a partir dos recursos e activos propios do territorio. A sesión tivo como obxectivo fomentar o traballo colaborativo e a xeración de propostas con identidade, capaces de responder ás demandas actuais do mercado turístico.

Durante a xornada, desenvolvida cun enfoque práctico, as persoas participantes compartiron coñecemento, identificaron oportunidades e avanzaron na definición de produtos turísticos vinculados á identidade local, especialmente arredor dun dos elementos máis representativos do Carballiño: o polbo.

Esta iniciativa forma parte da posta en marcha do club de produto “Polbo con Orixe”, que busca implicar activamente ao tecido empresarial e asociativo na construción dunha oferta turística estruturada, competitiva e diferenciada. Así mesmo, este tipo de sesións permiten dar a coñecer os servizos e ferramentas que o club ofrecerá ás entidades e empresas adheridas.

O club de produto “Polbo con Orixe” desenvólvese ao abeiro do Plan de Sostibilidade Turística en Destino “O Carballiño e a gastronomía do polbo”, financiado pola Unión Europea – NextGenerationEU, o Ministerio de Industria e Turismo e a Axencia de Turismo de Galicia no marco do Plan de Recuperación, Transformación e Resiliencia.

As entidades e empresas interesadas en formar parte do club poden solicitar máis información a través do correo electrónico clubdeproducto@carballino.gal ou na páxina web www.pulpoconorigen.com.

• Tres desfiles multitudinarios consolidan unha programación diversa
• A XXXI Festa da Cachucha mobiliza milleiros de reservas na hostalería
• Tradición e innovación conviven nun modelo festivo en expansión

O Carballiño pechou unha nova edición do Entroido confirmando a súa posición como unha das celebracións máis dinámicas da provincia. Durante dez días, a Praza Maior e as rúas da vila convertéronse nun espazo de encontro onde a música, a creatividade e a gastronomía foron protagonistas, nun equilibrio natural entre tradición e propostas innovadoras.

Un dos grandes sinais de identidade desta edición foi a celebración de tres desfiles multitudinarios, que marcaron distintos momentos da programación: o desfile escolar, que abriu a participación da comunidade educativa; o desfile dominical; e o Gran Desfile do martes, que congregou folións, comparsas e charangas chegadas de diferentes puntos de Galicia, ademais das agrupacións locais. A estes sumáronse propostas como batucadas, espectáculos itinerantes, animación musical continua e actuacións en directo que mantiveron a actividade ao longo de todas as xornadas.

A programación reforzou tamén o carácter interxeracional da festa, con actividades específicas para o público infantil, como o obradoiro de máscaras, e cunha oferta musical variada que incluíu actuacións e grupos que dinamizaron o centro urbano ata o remate das celebracións.

Un dos momentos centrais volveu ser a XXXI Festa da Cachucha, plenamente consolidada como unha cita gastronómica de referencia. Restaurantes, mesóns e pulperías do municipio rexistraron milleiros de reservas ao longo da fin de semana grande, acadando cifras de ocupación e impacto económico que sitúan o Entroido en rexistros próximos aos da Festa do Pulpo, un dos principais eventos turísticos do Carballiño.

A implicación da hostalería, do comercio local, das asociacións culturais e da veciñanza evidencia que o Entroido é moito máis ca unha celebración puntual: trátase dun evento con capacidade real de dinamización económica e social, que reforza a identidade da vila e proxecta unha imaxe de municipio activo e participativo.

O tradicional Enterro da Sardiña puxo o broche final a unha edición marcada pola alta participación e pola diversidade de propostas, confirmando que o Entroido do Carballiño continúa medrando en calidade organizativa, capacidade de convocatoria e proxección exterior.

Desde o Concello valórase moi positivamente o desenvolvemento da programación e agradécese a colaboración de colectivos, comparsas, establecementos hostaleiros, corpos de seguridade e persoal municipal, cuxa implicación fai posible que cada ano o Entroido siga evolucionando sen perder a súa esencia popular.