O Carballiño é sinónimo de gastronomía, natureza, termalismo e patrimonio.
Ven e vive O Carballiño!
O Carballiño é un concello da provincia de Ourense a 25 km da capital, cunha poboación de 14.089 habitantes. É un dos cinco concellos desta provincia con máis de 10.000 habitantes, e dende 2020 o máis poboado tras a capital (105.643 habitantes).
No territorio son habituais os castiñeiros e carballos, de aí o seu nome. As serras da Martiñá, O Suido e O Testeiro rodean este destino, con picos que, nalgúns casos, chegan a sobrepasar os 1.000 metros.
Un dos recursos máis característicos deste concello é a auga.
A auga subterránea dos seus manantiais con propiedades mineromedicinais, convertendo a este destino nun paraíso termal.
A auga que utilizan as pulpeiras e pulpeiros para cocer o pulpo.
E a auga do río que transcorre por estas terras, o Arenteiro, creando unha paisaxe e contorna natural de gran atractivo; e dando vida ás 16 parroquias que conforman o destino: Arcos, Banga, Cabanelas, O Carballiño, Lobanes, Longoseiro, Madarnás, Mesiego, Moldes, Partovia, Piteira, Puente-Veiga, Sagra, Seoane, Señorín e O Barón. Zonas recreativas, fontes, muíños, zonas de pesca ou lavadeiros son habituais nas proximidades da canle deste río.
Ao falar ou pensar no Carballiño é inevitable pensar no produto estrela deste concello, o pulpo, e na figura da pulpeira e o pulpeiro.
A orixe desta vinculación está na localidade de Santa María de Arcos, berce dos pulpeiros e pulpeiras auténticos e artesáns na preparación do prato típico do “pulpo á feira”.
Tradición que se materializa na romaría con máis sona deste concello, A Festa do Pulpo do Carballiño, con máis de 50 anos de historia, que poden parecer insignificantes se os comparamos cos máis de tres séculos dende a introdución deste produto mariño nas terras do interior de Galicia, pero que resultaron ser máis que suficientes para alcanzar a cualificación de Festa de Interese Turístico Internacional.
