Museo Fábrica de Papel
Parque Etnográfico do Arenteiro
Xunto ao río Arenteiro, preto de Longoseiros, conservábanse as ruínas da que foi unha importante fábrica de papel de mediados do século XIX. Na década de 1840 produciuse na fábrica un incendio que afogou en débedas aos seus propietarios, que co tempo acabaron abandonando o negocio. Século e medio despois, está a traballarse na reconstrución do edificio para convertelo nun museo da elaboración do papel. Unha vez que estea finalizado, os visitantes e escolares poderán observar en directo como se confeccionaba o papel. O edificio tamén albergará unha sala de exposicións e outras infraestruturas para o desenvolvemento de actividades culturais.